Isra'iliye omumiy saylimi we ottura sherq tinchliqi

ئىخچام



Isra'iliye omumiy saylimi ottura sherq tinchliqigha tesir körsitemdu?


Isra'iliye parlamént saylimi 10-féwral ötküzülidu, saylamda ghelibe qilghan partiye yéngi hökümet teshkilleydu.
Hazir ottura sherq tinchliq musapisi achquchluq basquchta turuwatqanliqini közde tutqanda, isra'iliye siyasiy sehnisining yéngi endizisi we siyaset yüzlinishi pelestin-isra'iliye tinchliq söhbiti we ottura sherq tinchliqining istiqbaligha muhim tesir körsitidu.

Saylam ehwalini belgileydighan töt amil

Yerlik axbarat wasitilirining xewirige asaslan'ghanda, bu qétimqi parlamént saylimigha jem'iy 33 partiye qatnishidighan bolup, ular parlaménttiki 120 orunni talishidiken.
Tehlilchilerning qarishiche: hazirqi ehwaldin qarighanda töwendiki amillar saylighuchilarning bélet tashlashni qarar qilishigha tesir körsitidiken.
Birinchi, bixeterlik mesilisi. Bixeterlik mesilisi saylighuchilar oylishidighan eng muhim mesile. Buningda nétanyaxu rehberlikidiki ong qanat partiye − likud guruhining bixeterlik teshebbusi saylighuchilarni téximu jelp qilidu.
Ikkinchi, isra'iliye-amérika munasiwiti. Isra'iliyining uzaq mezgillik ittipaqdishi bolush süpiti bilen amérikining qollishi intayin muhim. Isra'iliye bilen amérikining ittipaqdashliq munasiwitini nezerge élish saylighuchilarning qarar qilishigha tesir körsitidighan yene bir amil.
Üchinchi, pelestin-isra'iliye tinchliq söhbiti. 2007-yili 11-ayda amérikining annapolista ötküzülgen ottura sherq mesilisi xelq'ara yighinidin buyan, algha partiyisi teshebbus qilghan hökümet bilen pelestin milliy hakimiyet orgini ötküzgen tinchliq söhbitide qilche ilgirilesh bolmidi. Bundaq weziyet saylighuchilarning meydani qattiqraq partiye-guruhlarni qollishigha türtke bolushi mumkin.
Tötinchi, iqtisadiy mesile. Hazir dunya pul mu'amile krizisigha duch keldi, isra'iliyimu iqtisadning chékinishidek keskin sinaqqa duch kelmekte. Saylamgha qatnashqan partiyiler teshebbus qilghan iqtisadiy siyaset saylighuchilarning bélet tashlashni qarar qilishigha melum derijide tesir körsitidu.

Qaysi partiyining utup chiqishigha bir néme déyish qiyin

Isra'iliye «yérusalém pochtisi géziti» bilen smis tetqiqat merkizi birlikte ötküzgen el rayini tekshürüshte körsitilishiche, likud guruhi 26 orun'gha ériship, algha partiyisiningkidin üch orun aldida turghan;
«dölet zémini» gézitining el rayini tekshürüshte körsitilishiche, likud guruhi algha partiyisiningkidin ikki orun aldida turghan;
Isra'iliye 2-téléwiziye istansisining el rayini tekshürüshide körsitilishiche, likud guruhning aldinqi qatarda turush üstünlüki peqet bir orunla bolghan.
Likud guruhining sella aldida turush üstünlüki saylam ehwalining yenila murekkep bolidighanliqini, axirida qaysi partiyining utup chiqishigha bir néme déyishning qiyinliqini chüshendüridu.
Uningdin bashqa, lébérman rehberlikidiki yene bir ong qanat partiye − «isra'iliye - yurtimiz» partiyisining qara tulpar bolup qélish éhtimalliqi nahayiti zor. El rayini tekshürüshte körsitilishiche, mezkur partiye saylamda 17 din 18 giche orun'gha ériship, ishchilar partiyisining érishish mumkinchiliki bolghan 15tin 16 giche orundin éship, likud guruhi, algha partiyisidin qalsila 3-chong partiyige aylinidiken. Bu siyasiy sehne endizisi, yéngi hökümetning teshkillinishi we ottura sherqning tinchliq istiqbaligha sel chaghlashqa bolmaydighan tesir peyda qilidu.
Ottura sherq tinchliqigha tesir körsitidu.

Algha partiyisi bilen likud guruhining siyasiy meydanidin qarighanda, saylamda kimning ghelibe qilishi hem yéngi hökümet teshkillishidin qet'iynezer ularning pelestin -isra'iliye tinchliq söhbitidiki yadroluq mesilide yol qoyushi qiyin, iran'gha tutqan pozitsiyisinimu asanliqche özgertmeydu. Shuning üchün, ottura sherq tinchliq musapisida yenila asanliqche mahiyetlik bösüsh bolmaydu.

Shinxua agéntliqi.
menzil: http://palastinbiz.blogspot.com