ئەرەب - ئىسرائىلىيە مۇناسىۋىتىدىكى ئىككى تەرەپ سۆھبىتى

ئەرەب دۆلەتلىرى بىلەن ئىسرائىلىيە مۇناسىۋىتىدىكى ئىككى تەرەپ سۆھبىتى ئاساسلىقى ئىسرائىلىيىنىڭ سۇرىيە، لىۋان، ئىئوردانىيە ۋە پەلەستىن قاتارلىق ئەرەب دۆلەتلىرى بىلەن بولغان بىۋاسىتە سۆھبىتىنى كۆرسىتىدۇ.
ئەرەب دۆلەتلىرى بىلەن ئىسرائىلىيە ئارىسىدىكى ئىككى تەرەپ سۆھبىتىدە پەلەستىن - ئىسرائىلىيە سۆھبىتى ھەل قىلغۇچ سۆھبەت ھېسابلىنىدۇ




ئەرەب دۆلەتلىرى بىلەن ئىسرائىلىيە مۇناسىۋىتىدىكى

ئىككى تەرەپ سۆھبىتى


2007- 12- 07 18:34 «شىنجاڭ گېزىتى»


ئەرەب دۆلەتلىرى بىلەن ئىسرائىلىيە مۇناسىۋىتىدىكى ئىككى تەرەپ سۆھبىتى ئاساسلىقى ئىسرائىلىيىنىڭ سۇرىيە، لىۋان، ئىئوردانىيە ۋە پەلەستىن قاتارلىق ئەرەب دۆلەتلىرى بىلەن بولغان بىۋاسىتە سۆھبىتىنى كۆرسىتىدۇ.

1991 – يىلى ئۆكتەبىرنىڭ ئاخىرىدا ئۆتكۈزۈلگەن «مادرىد تىنچلىق سۆھبىتى»نىڭ ئېچىلىشى بىلەن، ئەرەب دۆلەتلىرى بىلەن ئىسرائىلىيە ئارىسىدا ئىككى تەرەپ سۆھبىتىنىڭ مۇقەددىمىسى باشلانغانىدى. ئىسرائىلىيە ئارقىدىنلا سۇرىيە، لىۋان، ئىئوردانىيە ۋە پەلەستىن بىلەن مادرىدتا تۇنجى قېتىم بىۋاسىتە سۆھبەتلەشكەن.


ئىئوردانىيە – ئىسرائىلىيە تىنچلىق سۆھبىتى

ئىئوردانىيە 1994–يىلى ئۇرۇش ھالىتىنى ئاخىرلاشتۇرۇش مەقسەت قىلىنغان «ۋاشىنگتون خىتابنامىسى» ھەم «تىنچلىق كېلىشىمى»گە ئىمزا قويۇپ، مۇناسىۋەتنى نورماللاشتۇرغان. ئىسرائىلىيە ئىشغال قىلىۋالغان ئىئوردانىيە زېمىنىدىن 1995 – يىلى فېۋرالدا ئەسكەرلىرىنى پۈتۈنلەي چېكىندۈرگەن، ئىئوردانىيە 340 كۋادرات كىلومېتىر كېلىدىغان زېمىنىنى قايتۇرۇۋالغان.


سۇرىيە – ئىسرائىلىيە تىنچلىق سۆھبىتى

سۇرىيە – ئىسرائىلىيە تىنچلىق سۆھبىتىدە، سۇرىيە بىلەن ئىسرائىلىيىنىڭ گولان ئېگىزلىكىنى چۆرىدەپ ئېلىپ بارغان تىنچلىق سۆھبىتى تۇرۇپ توختاپ، تۇرۇپ داۋاملاشقان. 1996–يىلى مارتنىڭ باشلىرىدا سۇرىيە - ئىسرائىلىيە تىنچلىق سۆھبىتى ئۈزۈلۈپ قالغان. 1999–يىلى دېكابىردا سۇرىيە – ئىسرائىلىيە تىنچلىق سۆھبىتى بىر مەزگىل ئەسلىگە كەلگەن، لېكىن ئاخىرىدا ئىختىلاپ كۆپ بولغانلىقتىن، سۆھبەت 2000 – يىلى يانۋاردا يەنە ئۈزۈلۈپ قالغان. سۇرىيە ۋە ئىسرائىلىيە 2006 – يىلىدىن بۇيان 2000–يىلى ئۈزۈلۈپ قالغان سۆھبەتنى قايتىدىن باشلاشنى ئارزۇ قىلىدىغانلىقىنى كۆپ قېتىم ئوتتۇرىغا قويغان. سۇرىيە گولان ئېگىزلىكىنى قايتۇرۇۋېلىشقا ھوقۇقلۇق ئىكەنلىكىنى تەكىتلىگەن، ئەمما ئىسرائىلىيە سۆھبەتنى «باشتىن باشلاش»نى ئارزۇ قىلىدىغانلىقىنى ئوتتۇرىغا قويغان.


لىۋان – ئىسرائىلىيە تىنچلىق سۆھبىتى

لىۋان – ئىسرائىلىيە تىنچلىق سۆھبىتىدە، لىۋان ھۆكۈمىتى كۆپ قېتىم «لىۋان – ئىسرائىلىيە تىنچلىق سۆھبىتى سۇرىيە – ئىسرائىلىيە تىنچلىق سۆھبىتى بىلەن تەڭ ئېلىپ بېرىلىشى كېرەك، لىۋان ئىسرائىلىيە بىلەن ئۆز ئالدىغا قەتئىي ‹تىنچلىق كېلىشىمى› ئىمزالىمايدۇ» دەپ تەكىتلىدى.
ئىسرائىلىيە 2000–يىلى مايدا لىۋاننىڭ جەنۇبىدىكى «بىخەتەر رايون»دىن ئەسكەر چېكىندۈرگەن، لېكىن سۇرىيە - لىۋان ئارىسىدا تالاش – تارتىش بولۇۋاتقان «ساباھ» دېھقانچىلىق مەيدانىدىن ئەسكەر چېكىندۈرمىگەن.


پەلەستىن – ئىسرائىلىيە تىنچلىق سۆھبىتى

ئەرەب دۆلەتلىرى بىلەن ئىسرائىلىيە ئارىسىدىكى ئىككى تەرەپ سۆھبىتىدە پەلەستىن - ئىسرائىلىيە سۆھبىتى ھەل قىلغۇچ سۆھبەت ھېسابلىنىدۇ.
پەلەستىن بىلەن ئىسرائىلىيە ۋاشىنگتوندا پەلەستىن ئاپتونومىيە «پرىنسىپ خىتابنامىسى»غا ئىمزا قويۇپ، پەلەستىنلىكلەرنىڭ غەززە ۋە جېرىكو رايونىدا ئاپتونومىيە ھوقۇقىنى ئالدىن يولغا قويۇشىغا رۇخسەت قىلغان، ئەڭ ئاخىرقى ئورۇن سۆھبىتى 1999–يىلى 4 – مايدىن بۇرۇن ھەل قىلىنىدىغان بولغان. پەلەستىن ئارقىدىنلا ئىسرائىلىيىنىڭ قولىدىن غەززە رايونى ۋە جېرىكونىڭ باشقۇرۇش تەۋەلىكى ھوقۇقىنى ئۆتكۈزۈۋېلىپ، ئاپتونومىيە رەھبەرلىك ئاپپاراتى قۇرغان.
نېتانىياخۇ 1996– يىلى 5 – ئايدا ئىسرائىلىيە زۇڭلىسى بولغاندىن كېيىن، «زېمىن بەدىلىگە تىنچلىققا ئېرىشىش» پرىنسىپىنى «خەۋپسىزلىك بەدىلىگە تىنچلىققا ئېرىشىش» پرىنسىپىغا ئۆزگەرتكەنلىكتىن، پەلەستىن بىلەن ئىسرائىلىيىنىڭ ئەڭ ئاخىرقى ئورۇن سۆھبىتى توختاپ قالغان. پەلەستىن، ئىسرائىلىيە ۋە ئامېرىكا ئامېرىكىدىكى داۋىد لاگېرىدا باشلىقلار يىغىنى ئۆتكۈزگەن، لېكىن سۆھبەتتە ئىجابىي ئىلگىرىلەش بولمىغان.

2003 – يىلى 30 – فېۋرال خەلقئارا جەمئىيەتنىڭ ياراشتۇرۇشى بىلەن پەلەستىن بىلەن ئىسرائىلىيىنىڭ تىنچلىقىنى ئىشقا ئاشۇرۇش مەقسەت قىلغان ئوتتۇرا شەرق تىنچلىقى «يول خەرىتىسى» پىلانى رەسمىي ئېلان قىلىنغان.
پەلەستىن بىلەن ئىسرائىلىيە رەھبەرلىرى شۇنىڭدىن كېيىن كۆپ قېتىم ئۇچراشقان. ئىسرائىلىيە 2005–يىلى ئاۋغۇستتا بىرتەرەپلىك ھەرىكەت پىلانىنى يولغا قويۇپ، غەززە رايونىدىن ئەسكەر چېكىندۈرگەن. ئەمما پەلەستىن - ئىسرائىلىيە توقۇنۇشىنىڭ توختىمىغانلىقى ۋە ئىككى تەرەپنىڭ ھەل قىلغۇچ مەسىلىلەر توغرىسىدىكى ئىختىلاپى چوڭ بولغانلىقتىن، پەلەستىن بىلەن ئىسرائىلىيىنىڭ تىنچلىق مۇساپىسى ماھىيەتلىك ئىلگىرىلەشكە ئېرىشەلمىگەن.


شىنخۇا ئاگېنتلىقى

مەنزىل
http://palastinbiz.blogspot.com/
ــــــــــــــــــــــــــــــــ