Ghezzediki insanlar qandaq yashawatidu?

Ghezzediki insanlar qandaq turmush kechuriwatidu?


Ghezzede boghuzdin bolka pishuruluwatidu


2008- 12- 08 «shinjang géziti»


Pakistan «el eyyam» gézitining 24 – noyabirdiki xewiride éytilishiche, hazir isra'iliye ghezzeni dawamliq qamal qiliwatqachqa, u jaydiki pelestinlikler éghir insanperwerlik krizisigha duch kéliptu. Nurghun bolkixana boghuzdin bolka pishuruwétiptu.
Ehwal kishilerning tesewwuridikidinmu nachar iken, isra'iliyining qamili tüpeyli asasliq turmush eshyalirini ghezzege yetküzüsh mumkin bolmighachqa, ashliq iskilatliridiki un téz azlap, hazir 3000 tonnidin köprekla qalghan, bu 1 milyon 500 ming nopusi bar ghezzege nisbeten héchnémige dal bolmaydiken. Ashliqni téjesh üchün, bezi bolkixanilar bashqa chiqish yoli izdep, at – ulaq, öy qushlirigha bérilidighan boghuzdin polka pishurushqa mejbur bolghan.
Boghuzda bolka pishurushning yene bir sewebi, ghezzediki ahaliler bek namrat bolghachqa, unda pishurulghan bolkini sétiwélishqa qurbi yetmeydiken.
Ghezze kölimi aran 365 kwadrat kilométir kélidighan alqanchilikla yer, uning iqtisadiy jehette özini qamdash iqtidari bolmighachqa, turmushta pütünley sirtning yardimige tayinidu. Unni misalgha alsaq, ghezzege toshup kélin'gen un asasen amérika we rosiyining uni. Amérika unining tonnisi 300 dollar, rosiyining 280 dollar. Boghuzning tonnisi 150 dollardin ashmaydu, beziliri hetta 100 dollar etrapida, shunga kishiler erzinini tallaydu. Epsuski, ilajisizliqtin qollinilghan bu tedbir saghlamliqni bedel qilghan.
Yéqinda dunya ashliq mehkimisi élan qilghan doklatta: «ghezzediki ahalining teng yérimi ishsiz, kishini téximu chöchütidighini, %70 kishining kündilik turmush rasxoti ikki dollar(konkrét 1.2 dollar)gha yetmeydu, namratliq chékidin xélila töwen. Uning üstige yémeklik kemchil bolghanliqtin, ghezze ahalisining qan azliq késilige giriptar bolush nisbiti örlewatidu» déyildi.

«yer shari waqit géziti»din
*****************************