غەززەدە ئىنسانىيەتنىڭ ۋىجدانى ئۆلۈۋاتىدۇ

غەززەدە ئىنسانىيەتنىڭ ۋىجدانى ئۆلۈۋاتىدۇ


رەجەپ تايىپ ئەردوغان پەلەستىن ئۈچۈن سۆزلىدى


«ئىزدىنىش»تىن
DJ_MardaN
نىڭ بايانى:

(ئىككى ھەپتىدىن بېرى ئىسرائىلىيەنىڭ پەلەستىننىڭ گازا رايونىدا ئېلىپ بېرىۋاتقان قەتلىئاملىرىغا قارىتا دۇنيا جامائەتچىلىكىنىڭ ۋە ھەرقايسى دۆلەت رەھبەرلىرىنىڭ ئىنكاسى ئىزچىل تۈردە پاسسىپ ھالەتتە بولۇپ كەلدى. پەقەت تۈركىيەنىڭ باش مىنىستىرى رەجەپ تايىپ ئەردوغان بىر ئىشلارنى قىلىشقا تىرىشىۋاتىدۇ. ئىران، ۋىنسۇئىلا ئەلباشلىرىدەك ئۇلۇغ قۇرۇق شۇئارلار ئاتماي قۇلىدىن كېلىشىچە پەلەستىن خەلقىغە ماددى ۋە مەنىۋى جەھەتتىن ياردەم قىلىپ قوللاپ كېلىۋاتىدۇ. ھازىرغا كەلگۈچە تۈركىيە ھۆكۈمىتى ۋە تۈركىيەدىكى ئاممىۋى تەشكىلاتلار پەلەستىن خەلقىغە زور مىقتاردا دورا، يىمەك-ئىچمەك ياردىمى قىلدى. باش مىنىستىر ئەردوغان چوڭ دۆلەتلەرنىڭ رەھبەرلىرىگە ئىسرائىلىيەگە بېسىم ئىشلىتىپ بۇ قەتلىئامنى توختىتىش ھەققىدە توختىماي چاقىرىق قىلىۋاتىدۇ. ھەتتا مۇشۇ كۈنلەردە تۈركىيە ھۆكۈمىتى مەخسۇس ئايرۇپىلان ۋە پاراخوت تەييارلاپ، پەلەستىندىكى يارىدارلارنى پاسپورت ۋىزا تەلەپ قىلماي تۈركىيەگە ئېلىپ كېلىپ ھەقسىز داۋالاۋاتىدۇ. باش مىنىستىر رەجەپ تايىپ ئەردوغاننىڭ پەلەستىندىن كەلتۈرۈلۈپ تۈركىيەدە داۋالاۋاتقان يارىدارلارنى يوقلاپ دوختۇرخانىغا بارغاندا سۆزلىگەن سۆزلىرىنى ۋە پارتىيەسىنىڭ يىغىنىدا دىگەن بەزى گەپلىرىنى سەۋىيەمنىڭ يېتىشىچە تەرجىمە قىلىپ چىقىرىپ قويدۇم.)
ـــــــــــــــــــــ


باش مىنىستىر رەجەپ تايىپ ئەردوغان، گازا قەتلىئامىدا يارىدار بولۇپ تۈركىيەنىڭ ئاتاتۈرك مائارىپ ۋە تەتقىقات دوختۇرخانىسىدا ياتقۇزۇلۇپ جىددى داۋالىنىۋاتقان پەلەستىنلىكلەرنى يوقلىدى. ئەردوغان، دوختۇرلاردىن كىسەللەرنىڭ ئەھۋالى ھەققىدە مەلۇمات ئالدى. بەزى پەلەستىنلىكلەرنىڭ ئېچىنىشلىق يارىسى ۋە ئۇلارنىڭ قەتلىئام ھەققىدە دىگەن گەپلىرىنى ئاڭلاپ كۆزلىرىگە ياش كەلدى. دوختۇرخانىدىن ئايرىلغاندىن كېيىن مۇخبىرلارنىڭ سۇئاللىرىغا جاۋاپ بەرگەن ئەردوغان مۇنداق دېدى:

- سىلەرمۇ بىلىسىلەر، پەلەستىنگە ئايرۇپىلان ئەۋەتىپ 10 يارىدارلارنى ۋە ئۇلارنىڭ ئائىلە-تاۋاباتلىرىنى ئېلىپ كەلدۇق. ئەسلىدە بۇ جىدىى قۇتقۇزۇش ئايرۇپىلانىمىز 40 يارىدار بىلەن ئائىلە تاۋاباتلىرىنى توشۇيالايتى، بېرىشتا دورا قاچىلاپ بېرىپ كېلىشتە يارىدارلارنى ئېلىپ كېلىشنى پىلانلىغان ئىدۇق. ئەمما ئىسرائىلىيە تەرەپ بىلەن شۇنچە كۆرۈشسەكمۇ تېخىمۇ جىق يارىدار ئېلىشىمىزغا يول قويمىدى. لېكىن تېخىمۇ جىق يارىدارنى تۈركىيە ئەكىلىپ داۋالاش ئۈچۈن توختىماي كۆرۈشىۋاتىمىز.

دوختۇرخانىدا كۆردۈم، يارىدارلارنىڭ جىقى (چەكلەنگەن) فوسفور بومبىسىدا كۆيۈپ يارىلانغانلار ۋە بومبا پارتىلاشتا يارىلانغانلار ئىكەن. دوختۇرلار بىر يارىدارنىڭ ئىككى پۇتىنى پۈتۈنلەي كېسىشكە مەجبۇر بولدى، بېلىنىڭ ئاستى يوق. يەنە بېلىگە، بوينىغا بومبا پارچىسى، ئوق كىرىپ پالەچ بولغانلارمۇ بار. بۇلارنىڭ جىقى ياش بالىلار. دوختۇر دوستلىرىمىزغا كۆپتىن-كۆپ ياردەم ئېيتىمەن، ھازىر 10 نەپەر يارىدارنى جىددى داۋالاۋاتىدۇ. ئۇلارنى ساقايغۇچە داۋالايمىز. يارىدارلارنىڭ بېشىدا تۇرىۋاتقان ئائىلە-تاۋاباتلىرىنىمۇ ئەڭ ياخشى شەكىلدە كۈتىۋالىمىز.


رەجەپ تايىپ ئەردوغاننىڭ پەلەستىن ئۈچۈن سۆزلىگەن سۆزلىرى:


2008 - يىلى 12- ئاينىڭ 27 - كۈنى باشلانغان ئىسرائىلىيەنىڭ غەززەگە قارىتىلغان ھۇجۇمى 3-ھەپتىسىگە قەدەم باستى.
ئۆلگەنلەر 900 دىن ئاشتى.
سەبىي بالىلارنىڭ ئۆلۈملىرىنى پۈتۈن دۇنيا نەق مەيداندىن كۆرۈپ تۇرۇپ، ھازىرغىچە ئۇرۇشنى توختىتالمىدى.
ب د ت خەۋپسىزلىك كېڭىشى ئۇرۇش توختىشىش قارارى چىقارغان بولسىمۇ، ئىسرائىلىيە : «مەن بۇنداق قارارنى تونۇمايمەن» دەپ پىسەنت قىلمىدى.
ئىسرائىلىيەنىڭ بۇ ئىنكاسى خەلقئارالىق كېلىشىملەرگە بويسۇنۇپ باقمىغانلىقىنى كۆرسىتىدۇ.

خەلقئارا جامائەتچىلىكنىڭ كۆپ قىسىمى بۇ ھۇجۇمغا قارىتا تېخىچە پاسسىپ پوزىتسىيە تۇتىۋاتىدۇ. خۇددى: ئىسرائىلىيە باشتا ئىشىنى تۈگىتىۋالسۇن ئاندىن بىز كىرىپ تىنچلىقنى ئورنىتايلى. دىگەندەك پوزىتسىيەدە بۇلىۋاتىدۇ.
بۇ بولسا قەتلىئامغا شېرىك بولۇشتۇر.
جىمىجىت تۇرىۋالغان ھەممەيلەن ئۆلىۋاتقان سەبى بالىلارنىڭ جاۋاپكارىدۇر.
ئىنسانىيەتنىڭ ۋىجدانى يارا بولدى.
گازادا بۇلىۋاتقان ئىشلار دىپلوماتىيەنىڭ چەك-چىگرىسىدىن ھالقىپ كەتتى.
(دىپلوماتىيەلىك يوللار بىلەن ھەل قىلغىلى بولمايدىغان دەرىجىگە كەلدى دىمەكچى).

ئەينى ۋاقتىدا يەھۇدىي خەلقى ئىسپانىيەدىن سۈرگۈن قىلىنغاندا ھازىرقى پەلەستىنلىكلەرگە ئوخشاش مەزلۇم ئىدى،
ھىچكىم قوينىغا ئالمىغاندا يەنە بىز، ئوسمان ئىمپىرىيەسى ئۇلارنى باغرىمىزغا باستۇق.
ئەمما ھازىر، ئەينى ۋاقىتتىكى مەزلۇم يەھۇدىيلار بۇ زۇلۇمنى پەلەستىنلىكلەرگە سېلىۋاتىدۇ.
كالللىسىغا توختىماي بومبا ياغدۇرۇپ زۇلۇم قىلىۋاتىدۇ.
ئىسرائىلىيەنىڭ بۇ ھۇجۇمىنىڭ ئارقىسىدا يېقىندا ئۆتكۈزىلىدىغان سايلام بار.
ئىسرائىلىيەلىك رەھبەرلەرگە دەۋاتىمەن،
تارىخ ئىسرائىلىيەنىڭ بۇ قىلمىشىنى بىر قارا داغ سۈپىتىدە يازىدۇ.
ئاتا-بوۋاڭلار ياۋروپادىن قوغلاندى بولغان چاغدا، بۇ تۇپراقلاردا سىلەرنى قوينىغا ئالغان ئوسمان تۈركلىرىنىڭ ئەۋلادلىرى بولۇش سۈپىتىمىز بىلەن بۇنى سۆزلەۋاتىمىز.

تېخى تۈنۆگۈن گرۇزىيەدە ئۇرۇش بولغاندا بەس-بەستە سايرىشىپ، ياردەم مۇسابىقىسىگە چۈشكەنلەر، ئىش پەلەستىنگە كەلگەندە نىمىشقا جىم تۇرىۋالىدۇ؟
كىشىلىك ھوقۇق تەشكىلاتلىرى نىمە ئۈچۈن ئاغزىڭلارنى يۇمىۋالىسىلەر؟ نىمىشقا؟...
ئەمما بىز پەلەستىنگە قۇلىمىزدىن كېلىشىچە ياردەم قىلىمىز،
مۇسۇلمان بولغانلىقى ئۈچۈنلا ئەمەس ئىنسان بولغانلىقى ئۈچۈن ياردەم قىلىمىز.
گرۇزىيە ئۇرۇشىدىمۇ تۇنجى ياردەمنى يەنە بىز ئەۋەتتۇق...
خەلقئارالىق تاراتقۇلار بىزنى ئەيىپلەۋاتىدۇ،
ئەردوغان ھىسياتقا بېرىلىپ سۆزلەۋاتىدۇ دەۋاتىدۇ.
مەن پەلەستىندە شېھىت بۇلىۋاتقان بىگۇناھ ئىنسانلارغا قارىتا ھىسياتچان پوزىتسىيە تۇتىۋاتىمەن.

تېخىچە رەھىمسىزلىك بىلەن ئېلىپ بېرىلىۋاتقان بۇ ھەرىكەتكە چىداپ تۇرغىلى بولمايدۇ.
پۈتۈن دۇنياغا شۇنى دېمەكچىمەن:
گازادا بىگۇناھ پۇقرالار بىلەن بىرلىكتە ئىنسانىيەت ئۆلىۋاتىدۇ،
سەبىلىك ئۆلىۋاتىدۇ،
ئىنسانىيەتنىڭ ۋىجدانى، غورۇرى ئۆلىۋاتىدۇ.
بۇ قەتلىئاملارغا جىمجىت قالغانلار تارىخنىڭ ئالدىدا بۇنىڭ سورىقىنى بېرىدۇ.

تۈركىيەنىڭ مەيدانى ئېنىق. بىز تىنچلىقنى، ھۇزۇر-ھالاۋەتنى، مۇقىملىقنى خالايمىز.
بىز پۇقرالارنىڭ ئۆلىشىگە، توقۇنۇشلارغا قارشى.
بۇ رايوندا توقۇنۇش داۋام قىلسا تىنچلىققا ھىچقاچان ئېرىشەلمەيمىز.
بۇ توقۇنۇشلار تىنچلىقنى يوقىتىپ ئوتتۇرا شەرقنى ئوت چەمبىرىنىڭ ئىچىدە مۇھاسىرىگە ئالىدۇ.

ئۇ بىگۇناھ سەبى بالىلارنىڭ باغچىلاردا ئۆلتۈرۈلىشى ھەقلىق قىلىپ كۆرسىتىلىۋاتىدۇ. بولۇپمۇ ئىسرائىلىيە بىلەن ئالاقىسى بولغان يەھۇدىيلارنىڭ قوللىشىغا ئېرىشىۋاتقان تاراتقۇلار: «بالىلار ئۇقۇشماسلىقتىن ئۆلدى، تېرورچىلار كىچىك بالىلارنىڭ كەينىگە مۈكىۋالغانتى» دەپ خەۋەر بېرىۋاتىدۇ.
دۆلىتىمىزدىكى بەزى تاراتقۇلارمۇ ئىسرائىلىيەنىڭ بۇ ھۇجۇمىنى ھەقلىق كۆرسىتىشكە ئۇرۇنىۋاتىدۇ.
مېنىڭ سۆزلىرىم ھەققىدە: «ئىسرائىلىيە بىلەن بولغان مۇناسىۋەتلىرىمىز بۇزۇلمىسۇن، ئەتىمىزنى ئويلىشىمىز كېرەك» دېيىشىۋاتىدۇ.
ئەگەر ئەتىمىزنى بەك بىلگۈڭلار كېلىپ كەتكەن بولسا، ۋاقىت ئايرىپ يېنىمغا كېلىڭلار، شەخسىي ئولتۇرۇپ (تۈركىيەنىڭ) ئەتىسى ھەققىدە سۆزلىشىمىز.
ئەردوغاننىڭ گەپلىرى بەك قاتتىق كەتتى دىگەنلەر بار،
بۇ گەپلىرىم فوسفور بومبىلىرىدىن قاتتىق ئەمەستۇ؟
تانكىلاردىن چىقىۋاتقان ئوقلاردىن قاتتىق ئەمەستۇ؟
مەنمۇ بىر ئىنسان ۋە بىر دادا....

مەنبە
http://www.izdinix.com/ShowPost.asp?ThreadID=34878
ــــــــــــــــــــــــــــــــــــــــــــــــــــــــ